Angharad Evans
Rheolwr Prosiect Sgiliau a Chyflogadwyedd, Uchelgais Gogledd Cymru
Wrth i ni ddathlu’r Wythnos Addysg Oedolion, mae’n gyfle i gydnabod na fu dysgu gydol oes erioed yn bwysicach i lwyddiant Gogledd Cymru yn y dyfodol.
Nid yw dysgu yn dod i ben pan fyddwn yn ymadael â’r ysgol, coleg neu brifysgol. Yn economi heddiw sy’n esblygu drwy’r amser, mae datblygu sgiliau newydd ar hyd ein bywydau yn hanfodol i helpu pobl adeiladu eu hyder, addasu i newidiadau, sicrhau cynnydd yn eu gyrfaoedd a manteisio ar gyfleoedd newydd.
Mae hyn yn neilltuol o berthnasol yn y Gogledd, lle mae cyfleoedd economaidd sylweddol yn dod i’r amlwg drwy weithgynhyrchu uwch, ynni glân a thechnoleg ddigidol. Drwy raglenni tebyg i Fargen Twf Gogledd Cymru, Parth Buddsoddi Sir y Fflint a Wrecsam a Phorthladd Rhydd Ynys Môn, mae gan y Gogledd gyfoeth o gyfleoedd ar y gorwel. Wrth i ddiwydiannau newydd dyfu a sectorau presennol yn esblygu, bydd llawer o swyddi’r dyfodol yn golygu fod angen i bobl ddysgu, addasu a datblygu sgiliau newydd yn barhaus drwy gydol eu gyrfaoedd.
Dyna pam fod dysgu gydol oes mor bwysig. I unigolion, gall dysgu agor drysau i yrfaoedd newydd, cefnogi cynnydd i swyddi sgil uwch a rhoi’r hyder i gymryd y cam nesaf. P’un ai yw rhywun yn dychwelyd i’r gwaith, yn ystyried newid gyrfa neu’n edrych am ddyrchafiad, mae dilyn hyfforddiant yn dangos cymhelliant, ymroddiad a pharodrwydd i ddysgu. Ynghyd â chymwysterau technegol, mae cyflogwyr yn rhoi gwerth cynyddol ar sgiliau y medrir eu trosglwyddo tebyg i gyfathrebu, gwaith tîm, datrys problemau, hyblygrwydd ac arweinyddiaeth.
Mae rhaglenni fel Cyfrifon Dysgu Personol yn rhoi mynediad i oedolion i hyfforddiant a gyllidwyd mewn sectorau blaenoriaeth, gan helpu unigolion i ennill cymwysterau cydnabyddedig a datblygu sgiliau y mae galw amdanynt. Mae’r cyfleoedd hyblyg hyn yn neilltuol o werthfawr ar gyfer pobl sy’n cydbwyso dysgu gyda gwaith, cyfrifoldebau gofalu neu ymrwymiadau eraill.
Ar gyfer cyflogwyr, mae buddsoddi mewn datblygu sgiliau yn gyfle i dyfu eich busnes. Yn aml gall sefydliadau sy’n cefnogi dysgu ddenu a chadw talent, croesawu technolegau newydd a gwella cynhyrchiant.
Mae Rhaglen Sgiliau Hyblyg Llywodraeth Cymru yn rhoi cefnogaeth ymarferol i fusnesau uwchsgilio ac ailsgilio eu gweithlu, gan helpu cyflogwyr i baratoi ar gyfer cyfleoedd y dyfodol tra’n cryfhau perfformiad cyfredol. Gall darparwyr hyfforddiant lleol hefyd gynnig cefnogaeth i gael mynediad i gyfleoedd hyfforddiant.
Fel mae’r Wythnos Addysg Oedolion yn ein hatgoffa, mae dysgu gydol oes yn cefnogi mwy nag uchelgais addysg gan alluogi unigolion a busnesau i ymateb i ofynion economaidd. Os yw Gogledd Cymru i wireddu’n llawn y cyfleoedd a gyflwynir gan y Fargen Twf, Parth Buddsoddi Sir y Fflint a Wrecsam, Porthladd Rhydd Ynys Môn a’r symud i economi carbon isel, mae’n rhaid i ni barhau i hyrwyddo dysgu gydol oes, cefnogi cynnydd a chreu cyfleoedd dysgu hygyrch i bawb.
Ein neges allweddol yw nad yw hi byth yn rhy hwyr i ddysgu. Daeth dysgu gydol oes yn allweddol i helpu pobl i aros yn hyblyg, hyderus a pharod ar gyfer cyfleoedd newydd. P’un ai’n gwrs byr i ddatblygu sgiliau newydd, hyfforddiant proffesiynol i gefnogi cynnydd gyrfa neu gymhwyster sy’n agor drysau i ddiwydiant newydd, gall pob cyfle dysgu helpu i lunio ein camau nesaf. Drwy groesawu dysgu gydol oes, gall unigolion gymryd rheolaeth o’u dyfodol, gall cyflogwyr adeiladu gweithluoedd cryfach a gall Gogledd Cymru barhau i dyfu.
